Ruthne Manane Ke Liye Shayari

Janti ho Wo kyun ruth jata hai tumse har baat par
Kya tumhe hai pata kyun udasi chha jati hai uski zaat par

Kabhi socha hai zimmedariyon ke bojh tale ladka kyun karta hai nakhre hazar
Kabhi gahrai me jao aur jaano ki kyun wo tumse naraz hota hai baar baar

ghar ki pareshaniyan daftar ke kaam hone ke baad bhi wo tumse kyun bahsta hai
Jiska dil hai itna komal bhala wo har baat ko lekar tum par kyun barsta hai

Nahi tumne nahi socha hoga kabhi aur naraz ho gayi
Kabhi wohi tha tuhamre par aaj tum khud hi parwaz ho gayi

Wo ye sab bas is liye karta hai kyun ki tum use manane aao
Wo pyar jo tum bhool jati ho apni mashroofiyat me uska use ahsas karao

Wo chahta hai ki tum use manate huye uske baalon me ungliyan ghumao
Jo kahin so gya hai kaam ke bojh tale us chahat ko tum fir se jagao

Aur haan wo darta hai ye soch kar ki kahin ye badhti duriyan tumhe usse dur na kar den
Wo sochta hai har baar ki ladne ke bahane hi sahi wo tumse kuchh baat to kar sake

Tumhe to yaad bhi nahi hoga ki pahli raaton ki tarah kab tumne puri raat usse baat ki hai
Tumhari aankhen ho gayi hain registan jaisi kab tumne us par mohabbat ki barsat ki hai

Socho bhala wo kyun tumse ladega chhoti chhoti baat par
Kyun bhala daag lagayega wo mohabbat ki zaat par

Tumhe agar yakeen na aaye meri baaton par to ek baar kah dena ki main jaa rahi hun
Mera dawa hai wo tumhare samne ro kar kahega na jao tum batao iske liye main kya kar dun

Wo to bas chahta hai ki tum us me ghul jao aise jaise saanson me gaanv ki mitti ghul jati hai
Uske ruthne ke baad tum milo usse aise jaise samandar me namak ki bori ghul jati hai

Tum samet lo use khud me kuchh is tarah jaise wo ruh ho tumhari
Wo to chahta hai ki koi baat meri uski na ho kar hamesha rahe hamari

To dhyan rakhna gar agli baar wo ruthe to koi judai wala geet gunguna dena
Uske ruthne par khud ruth jane se achha hai ki gale laga kar tum use mana lena